جنت زمین پر

جنوبی وزیرستان میں سکیورٹی فورسز نے بیت اللہ محسود کی زیر نگرانی تربیتی مرکز نواز کوٹ میں دہشت گردوں کی ”مصنوعی جنت “ دریافت کرلی ہے، جہاں خود کش حملہ آوروں کو ذہنی تربیت دیکر حملوں کیلئے تیار کیا جاتا تھا۔  اس  ”مصنوعی جنت “ میں بیت اللہ محسود کی زیر نگرانی 12سے 18سال کی عمر کے خودکش حملہ آور تیار کئے جاتے تھے۔ ان خودکش حملہ آوروں کونواز کوٹ کے تربیتی مرکز میں مصنوعی جنت کے نظارے کرائے جاتے مخصوص کمروں کی دیواروں پر رنگ برنگی پینٹنگز بنائی گئی تھیں جن میں دودھ اور شہد کی نہریں خوبصورت نظارے اور ان نہروں کے کنارے حوروں کی تصاویر بنائی گئی تھیں۔ معصوم بچوں کو جنت کے خواب دکھا کر اور حوروں کی قربت کا یقین دلا کر دودھ اور شہد کی بہتی نہروں کی پرکشش منظر کشی کے ذریعے معصوم لوگوں کو خودکش دھماکوں میں قتل کرنے پر اکسایا جاتا تھا ۔ اس تربیتی مرکز میں ایک مذبح خانہ بھی قائم تھا جہاں سکیورٹی فورسزکے مغوی اہلکاروں کو ذبح کیا جاتا تھا ۔